Act 3 | DOB | STEP | Ga 'ebweu tuta 'asuinuwanuwaya, Pita Yoni ma'iyana silagalaga Anuwa Tabu 'ena sabi sidasida, manuna nate sidasida 'ana tuta.

Acts 3

Tolopegoi sigie bobo'anena

1 Ga 'ebweu tuta 'asuinuwanuwaya, Pita Yoni ma'iyana silagalaga Anuwa Tabu 'ena sabi sidasida, manuna nate sidasida 'ana tuta. 2 Ta Anuwa Tabu nina 'ana 'awa sieesena Kausala selabenaya, tolopegoi 'ebweu 'imiyami, tauna 'ina tuta tubuwa 'enega ma ina lopegoi, 'enega gosenao 'asiyata 'ebweuna 'ebweuna 'ediya sime'eme'e 'awa nina 'ena be 'iesidasida 'ina mani nai 'ina gwegwe manudi, Anuwa Tabu 'ana toluguyao 'ediya. 3 Ga tolopegoi nina Pita be Yoni 'i'itedi 'iabe silulugu, 'enega lema manuna 'isida 'ediya. 4 'Enega Pita be Yoni siduneyena, ga Pita 'igwae, “'Udunema.” 5 'Enega tolopegoi nina 'iduneyedi ma ina emisa 'aene to'ase 'iabe si'ebwa'e.

6 Ta Pita 'igwae, “Nigeya 'ebweu wate 'igu manimo, ta oboboma nina 'eguya 'imiyami yada 'ebwa'eyo. To'etoseyana Yesu, tauna goma Nasaleta, 'ana esanega yaloineyo be 'utoolo be 'utatauya.” 7 Ga nima 'atainega 'igietoolona, ta 'ae tubwenao sipa'ala, 8 ga 'ilosuyaena ta 'itoolo, ta 'enega 'itauya, ga ma'ediya silugu Anuwa Tabu solanaya, ta tai nina 'ilosuyasuyae ta 'ituputupu Yaubada 'enaya.

9 'Enega boda si'itena tolopegoi nina 'itautauya ma ina lotuputupu Yaubada 'ena, 10 ga si'inanena 'aene tolopegoi nina lowa Anuwa Tabu 'ana 'Awa Kausala selabenaya 'imiyami ta 'iesidasida 'ana lema manuna, 'enega silosuyaedi ta sinuwaowana 'ina bobo'ana limana manuna.

Pita 'ina loguguya

11 Tuta nina tai nina Pita be Yoni 'igiyaidi Anuwa Tabu papenaya, tauna sieesena Solomoni 'ina 'aliupa, ga boda nidi ma idi nuwaowana sipili egogona 'ediya.

12 Ta Pita 'i'itedi, 'enega boda 'ieonedi, 'igwae, “Me Isileli 'omi, to'ase manuna wanuwa owana ta waduneduneyema? Nigeya 'aene tauma 'ima waiwaiyega nai 'ima bubuna 'esasena 'enega, tai gete 'agiebobo'anena ga 'itautauya, 13 ta esi Yaubada 'ina waiwaiyega, tauna Ebelaamo be Aisake be Yekobe 'idi Yaubada, ta tubudao 'idi Yaubada, ga ni'atu Yaubada 'ina 'ali'ei Yesu 'ana esana 'igitu'eyena, tauna lowa Pailato nuwanuwana be 'ili'ami, ta 'omi waeyaseyaseyena, ga wa'awa to'umaliyena Pailato matanaya. 14 Ona'ai'aila, Yesu tauna tai palupaluna ta 'esasena, ta wae'idi'idiyena, ga tomota 'adi toloemwawasa 'ebweu nuwanuwami, ga manuna Pailato 'ena wasidena. 15 'Enega yawasi bobo'ana 'ana to'ebwaya waloemwawasina, ta Yaubada tauna mwawasega 'igietoolo limena, ga maibo'ama 'a'itena. 16 'Enega Yesu 'ana esanega tai gete ni'atu 'ibobo'ana limana. Tai gete wa'itena ta wamwalatoninaya, ta Yesu 'ana esana 'iemisena, 'enega ni'atu matamiya 'ibobo'ana 'ai'aila, ta 'iewaiwai.

17 “Tasigwao, yamwalatonimi 'aene 'imi emwagemwageyega Yesu nina waloemwawasina, nadigega 'imi 'inapwanao. 18 Ta wanuwa'i'isi 'aene Yaubada 'ina palopitao 'ediyega 'igimi simanena 'aene To'etoseyana nina 'ina 'elouyao 'ida lobadi, 'enega ona nina 'ana 'ai'aila ni'atu 'iapwesa. 19 'Enega 'ilobwenemi be wanuwa'ebuni be 'imi loegesiyao 'ida 'ewayauledi, be 'ami lotoona bobo'ana wada loba 'Inapwana tauna 'enega, 20 be wate To'etoseyana nina, tauna 'igimi esinuwena, 'ida etune 'emiya, nate Yesu. 21 Tauna ni'atu galewaya 'itauya, be 'ida miyami 'ana laba yage maibo'adi 'ida giepaepaludi, nadigega Yaubada 'ina palopitao lowaenei sigimi simanena. 22 Lowa Mosese wate 'ionaupaupa, 'igwae,

‘Ma'etamo 'ida 'Inapwana Yaubada 'emiyega 'ebweu tai 'ida gilagasi be 'iepalopita manumi,

nadigega 'abo'agu 'igilagasigu, be 'ina simana maibo'adi wada nonodi. 23 Be 'abo yaisigedi palopita nina 'ina ona siguitoyase Yaubada 'ida gieto'umaliyedi, be 'ida 'ewayauledi 'ina tomotaiyao 'ediyega.’

24 Ta palopitao maibo'adi Samuwela 'enega ga taudi simuliyena 'ediya, 'idi onaupaupa 'ediyega sigimi simanena guinuwa nidi gete tuga manudi. 25 Ta 'omi palopitao nidi tubumiyao. Ta wate onaoboboma nina Yaubada tubudai Ebelaamo 'i'ebwa'ena, 'igwae,

‘'Oyo 'imu susuyega ma'etamo 'ebeloinao maibo'adi bale'uya 'idi 'ebe gwausowala.’

'Enega onaoboboma nina 'omi wate manumi. 26 Ta Yaubada 'ina 'ali'ei Yesu mwawasega 'igietoolo limena, ga 'omi me Yudia 'emiya 'igimi etunenama, be 'ina oboboma 'emiya nate 'aene 'imi loegesiyao 'ediyega wada nuwa'ebuni, ta mali bodao muliyega.”